Gotzon Barandiaran idazleak eta Rafa Rueda musikariak bost eguneko ikastaroa eman zuten gure idazle eta musikariek Euskal Herriari zelan kantatu dioten azaltzeko. 

Iparraldera begira jarri ginen 2015ean. ‘Haizea dator Iparraldetik!’ izenburuarekin, bi hitzaldi (Xan Airerena, eta Antton Luku eta Miren Artetxerena), mendi-ibilaldia, kantu-bazkaria, pastorala eta kontzertuak izan ziren. Haien osagarri, gehigarri berezia Barren aldizkarian.

‘Euskara Jendea, gure hizkuntzaren historia, gure historiaren hizkuntza’. Gure hizkuntzaren eta herriaren historia ezagutzeko antolatu genuen sei eguneko ikastaroa. Xamar izan zen irakaslea.

2013ko zikloan gure iraganari erreparatu genion batez ere, betiere etorkizuna irudikatzeko helburuarekin: horregatik ‘Atzera begira, aurrera egiteko’ izena. Eñaut Elorrieta eta Mikel Markezen kontzertu didaktikoarekin hasita, bi hitzaldik osatu zuten, Kike Amonarrizenak, eta Lorea Agirrek eta Unai Iturriagak elkarrizketan egindakoak.

‘Nafarroa arragoa, nahiaren eta ezinaren borroka-toki ekaitzez betea’. Hori izan zen laugarren edizioko programaren izenburua. Osagaiak, berriz, Nafarroari lotutako bi hitzaldi, Gartxot filmaren emanaldia, Peru harrira bisita, kantu- eta bertso-afaria, eta Orreagatik Belaguara arteko mendi-ibilaldia.

‘Izanaren izena’ izan zen hirugarren edizioaren izenburua. Hiru hitzaldi antolatu genituen: Elgoibarko toponimia eta toki izenei buruzkoa, Elgoibarko ahozko euskarari buruzkoa, eta euskal izenei buruzkoa. Bestalde, elgoibartarron izen-abizenak euskaratzeko kanpaina ere prestatu genuen. Gainera, Barren astekarian gehigarri bat argitaratu genuen.

2010ean Elgoibarko Udalak eta Elgoibarko Izarra elkarteak Gontzon Garateren lanari aitorpena egin nahi izan zioten. Hitzetatik harago, baina, haren lan nagusietako bat ezagutzeko parada eskainita: herritarren ahotik, Atsotitzak liburuaren irakurketa publikoa egin zen zikloa irekitzeko. Hiru egile handiren lana ezagutzeko saioekin osatu zen zikloa: Andoni Egaña, Anjel Lertxundi eta Anari, bakoitzak bertako aurkezle-elkarrizketatzailea lagun zuela.

Gotzon Garateren heriotzaren lehen urteurrena izan zen 2009an. Gotzonen oroimenez antolatu genuen edizio hura, eta, besteak beste, herri-omenaldia, haren lanen erakusketa, hitzaldi-zikloa eta Barren astekarian argitaratutako gehigarria prestatu genituen.

‘Euskal kultura tradizionala’ ikastaroa ez genuen, berez, Euskara ala ezkara zikloaren barruan antolatu, honen aurrekaria-edo izan zen. Xamarrek eman zuen ikastaroa, 20 ordukoa: etxea, inauteriak, ahozko kultura, mitologia edota euskara landu genituen bertan.